Katika kipindi kilichopita tulijifunza kwamba wewe ni mmisionari. Leo tunaona jambo jingine muhimu: sala yako ni sehemu ya utume.
Mpendwa mtoto mzuri unayenisikiliza, unaweza kuwa mbali na watoto wengine duniani, lakini sala yako inaweza kuwafikia. Unapomwomba Mungu awasaidie watoto wanaoteseka, wamisionari, mapadre, watawa na familia mbalimbali, unashiriki katika kazi ya Misioni.
Biblia inatufundisha:
“Salini bila kukoma.” (1 Wathesalonike 5:17)
Kwa hiyo, usifikiri kwamba lazima usafiri ili uwe mmisionari. Unaweza kuwa mmisionari ukiwa nyumbani kupitia sala yako.
Jaribu leo
Tenga dakika chache na useme:
“Ee Mungu, wabariki watoto wote duniani. Wasaidie wamisionari na uwape nguvu watu wote wanaowasaidia wengine. Amina.”
Ujumbe kwa wazazi
Mzazi, msaidie mtoto wako kujenga tabia ya kusali kwa ajili ya wengine. Sala ya mtoto inaweza kuwa zawadi kubwa kwa Misioni.
Kumbuka: Sala yangu inaweza kufika mbali hata kama sisafiri.
Katika kipindi kijacho: Tutazungumzia upendo wako kama utume na jinsi unavyoweza kumwonyesha mwingine upendo wa Yesu.

Imetayarishwa na Ofisi ya Mashirika ya Kipapa Taifa