Tumejifunza kwamba wewe ni mmisionari, sala yako ni utume na upendo wako ni utume. Leo tunajifunza kwamba ukarimu wako pia ni utume.
Mpendwa mtoto mzuri, huenda huna vitu vingi, lakini kila mtoto ana kitu cha kushirikisha: muda, nguvu, kipaji, chakula, vifaa vya shule, msaada au hata tabasamu.
Biblia inasema:
“Kila mtu na atende kama alivyokusudia moyoni mwake, si kwa huzuni, wala si kwa kulazimishwa; maana Mungu humpenda yeye atoaye kwa moyo wa ukunjufu.” (2 Wakorintho 9)
Kutoa si lazima iwe kitu kikubwa. Muhimu ni moyo unaotoa kwa upendo.
Na kama Mungu amekubariki kuwa na zaidi, kumbuka kwamba baraka hiyo inaweza kuwa nafasi ya kuwasaidia wengine zaidi.
Jambo la kufanya leo
Jiulize: “Nina kitu gani ambacho naweza kushirikisha mwingine?”
Unaweza kushirikisha chakula, muda, maarifa, kipaji au msaada.
Ujumbe kwa wazazi
Mzazi, msaidie mtoto wako kujifunza kutoa kwa moyo. Usimzuie kushiriki kwa sababu unafikiri ni mdogo. Mfundishe kwamba ukarimu ni sehemu ya maisha ya Mkristo na sehemu ya utume.
Kumbuka: Nilicho nacho kinaweza kuwa baraka kwa mwingine.
Katika kipindi kijacho: Tutafunga safari yetu kwa kujifunza ahadi ya mtoto kuwa mmisionari kila siku.

Imetayarishwa na Ofisi ya PMS Taifa