Katika vipindi viwili vilivyopita tumejifunza kwamba wewe ni mmisionari na kwamba sala yako ni utume. Sasa tunafika kwenye jambo jingine: upendo wako unaweza kuwa utume.
Mpendwa mtoto mzuri, watu wanaweza kumtambua Yesu kupitia namna unavyowatendea. Unapomsaidia mwenzako, kumfariji mwenye huzuni, kumsamehe aliyekukosea au kumkaribisha mtoto mwingine, unaonyesha upendo wa Kristo.
Yesu alisema:
“Ninyi ni nuru ya ulimwengu.” (Mathayo 5:14)
Na tena:
“Vivyo hivyo nuru yenu na iangaze mbele ya watu.” ( Mathayo 5:16)
Hivyo, usisubiri ufanye jambo kubwa. Anza na jambo dogo la upendo leo.
Jambo la kufanya leo
Chagua mtu mmoja na umfanyie jambo jema bila kutafuta sifa.
Kumbuka: Upendo wangu unaweza kumsaidia mwingine kumwona Yesu.
Ujumbe kwa wazazi
Mzazi, mfundishe mtoto kwamba upendo wa kweli unaonekana katika matendo. Mpe nafasi ya kusaidia, kushirikiana na kuwajali wengine.
Katika kipindi kijacho: Tutajifunza kuhusu ukarimu-jinsi kile ulicho nacho kinaweza kuwa sehemu ya utume wako.

Imetayarishwa na : Ofisi ya PMS Taifa